Psalms 50

Nzambe akosambisa bato na ye

Nzembo na Asaf

1 Moto na Nguya, Nzambe, Yawe, alobi
mpe abengi mokili
wuta epai moi ebimaka kino esika elalaka.

2 Wuta na Siona, oyo azali ya kokola na kitoko,
Nzambe azali kongenga.

3 Nzambe na biso azali koya, mpe
akokanga monoko te ;
moto ezali kozikisa liboso na ye,
mpe azingami na mopepe ya makasi.

4 Abengi likolo mpe se
mpo asambisa bato na ye ;

5 “Bosangisela ngai babulami na ngai nyonso esika moko,
baoyo basalaki boyokani na ngai na nzela ya mbeka
oyo bapesaki ngai !”

6 Mpe likolo ekosakola bosembo na ye ;
pamba te Nzambe ye moko nde azali zuzi.

7 Boyoka, bino bato na ngai, mpe nakoloba ;
Isayele, nakotatola mabe mpo na yo,
ngai oyo nazali Nzambe, Nzambe na yo.

8 Nakopamela yo te mpo na bambeka na yo
to mpo na makabo na yo ya kotumba
oyo ezalaka tango nyonso liboso na ngai.

9 Nazali na posa ya ngombe na ndako ya bibuele na yo te,
to mpe bantaba ya balopango na yo.

10 Pamba te banyama nyonso ya zamba ezali ya ngai,
na banyama oyo ezali likolo ya bangomba.

11 Nayebi bandeke nyonso oyo ezali na bangomba ;
mpe bikelamu ya bilanga
ezali ya ngai.

12 Soki nazalaki na nzala,
mbele nalingaki koyebisa yo yango te ;
pamba te mokili ezali ya ngai,
nyonso oyo ezali na kati na yango.

13 Boni, yo okanisi ete ngai naliaka misuni ya bangombe,
to namelaka makila ya bantaba ?

14 Pesa Nzambe likabo ya matondi ;
mpe kokisa ndayi na yo
epai na Ye Oyo Aleki Likolo.

15 Benga ngai na mokolo ya pasi ;
bongo ngai nakokangola yo, mpe yo okokumisa ngai.

16 Kasi epai ya moto ya mabe, Nzambe alobi :
“Nandingisa nini ozali kotanga-tanga mibeko na ngai,
to komema boyokani na ngai
likolo ya bambebo na yo ?

17 Yo moto oyinaka malako na ngai,
mpe obwakaka maloba na ngai na sima na yo.

18 Soki omoni moyibi,
osanganaka na ye ;
mpe ovandaka esika moko na bato oyo basalaka kindumba.

19 Osalelaka monoko na yo mpo na koloba mabe ;
mpe osalelaka lolemo na yo mpe lokuta.

20 Olobaka tango nyonso mabe mpo na ndeko na yo ;
mpe otongaka mwana ya mama na yo.

21 Makambo oyo yango nde osalaki,
kasi navandaki nye,
boni, yo okanisi ete ngai nakokani na yo ?
Kasi nakopamela yo,
mpe nakofunda yo na miso na yo.

22 Boyeba malamu oyo,
bino baoyo bobosanaka Nzambe ;
soki te nakopasola bino mike-mike,
mpe moto moko te akoya kokangola.

23 Moto oyo apesaka likabo ya matondi,
ye nde akumisaka ngai ;
mpe abongisaka nzela
mpo na koka kolakisa ye lobiko ya Nzambe.”